عندي سؤال بس ناقص إجابه..

عندي سؤال ؟ بس ناقص إجابه..


شكيت جـرحي للبحـر قـال تكبـر..

..وتشوف منهم فـي حياتـك غرابـه..

..نطقـت لـه تكفـى إذا كنـت تقـدر..

عندي سـؤال بس ؟؟ ناقص إجابـه..

[color=blue]..ليه القلوب اللي نحبها دوم تـغـدر ؟؟

..وليه الحزن يفرض علينـا ثيابـه ؟؟

..قال الكسر ما ظنيتي يـوم يـجـبـر..

..إلا إذا اللـي راح أعـلـن إيـابـه..

..قلت الوفا بين البشر ليـه ينـدر ؟؟

..ليه الـغـلا بالناس سهل إنقلابـه؟؟

..قال البشر طبـعـه غدر بس أصبـر..

..وأعرف ترى نصف الوجيـه تشابـه..

..دنيـاك لـو تصفـي فلا بـد تـقـدر..

..وتشوف شيب العمر بعـد الصبابه..

..وإن كان بدك الـحـل من قبل يصدر..

..خلك حريـص تعيـش كلـك مهابة..

..من قبل دمع العين بالـحـزن يحـذر..

..مـن قبـل لا وقتـك يعضـك بنيابـه..

..وقتك غريـب ومثلـك اليـوم ينـدر..

..يندر تعيش بـطـيبتك وسـط غابـة..

..بالقول كلمـة وأذكـره دوم وأخبـر..

..وأذكـر كلامـي لـك إجابـه إجابـه..

..لا تقول أنا فاهم على النـاس أقـدر..

..أقـدر أميّـز مـن دروسـي كتابـه

..صدقني هـذا وقـت خايـن ويغـدر..

..لو أنت ذيـب تخـون فيـك الذيابـه..